Lideri i BDI-së, Ali Ahmeti, ka reaguar pas dëshmisë së ambasadorit amerikan Kristofer Hill në Gjykatën Speciale në Hagë, duke theksuar se deklarimet e tij përbëjnë konfirmim të drejtësisë së luftës çlirimtare në Kosovë.
Sipas Ahmetit, ambasadori Hill – i cilësuar prej tij si njohës i thellë i zhvillimeve në Ballkan – ka deklaruar se vetëm ish-presidenti serb Sllobodan Millosheviq e kishte konsideruar Ushtrinë Çlirimtare të Kosovës si organizatë kriminale.
Ahmeti vlerësoi se një deklarim i tillë mbështet qëndrimet e tij se “çlirimtarët po përballen me akuza të sajuara, të cilat burojnë nga Beogradi dhe me ndikim të Moskës”.
Ai shtoi se javën e ardhshme pritet edhe dëshmia e gjeneralit amerikan Wesley Clark, e cila sipas tij do të forcojë më tej këtë argumentim.
“Pas këtyre konfirmimeve nga autoritetet e larta amerikane, mbetet vetëm vendimi përfundimtar meritor: liri për çlirimtarët”, deklaroi Ahmeti.
Ja postimi plotë:
Dëshmia amerikane në Hagë dëshmon dlirësinë e luftës çlirimtare të popullit shqiptar në Kosovë.
Edhe Ambasadori Kristofer Hill, njohës i shkëlqyer i rajonit, gjatë dëshmisë së kësaj jave në Hagë konfirmoi që vetëm kryekrimineli Sllobodan Millosheviq e konsideronte UÇK- në si kriminele dhe askush tjetër.
Kjo vërteton edhe deklaratat tona se çlirimtarët tanë po gjykohen me akuzë të sajuar në Beograd me porosi nga Moska.
Pas këtyre konfirmimeve nga autoritetet e larta amerikane dhe pas asaj që do të prezentohet javën që vjen nga Gjenerali Vesli Kllark, mbetet vetëm vendimi përfundimtar meritor, liri për çlirimtarët!
