Tiranë, 13 nëntor 2025
Sot, Reisul Ulema i Bashkësisë Fetare Islame të Republikës së Maqedonisë së Veriut, H. Hfz. Shaqir ef. Fetai, i shoqëruar nga H. Ismet Ademi, Drejtor për marrëdhënie me botën islame, dhe Mr. Fati ef. Azizi, Shef i Administratës, u prit në një takim miqësor dhe të ngrohtë nga Ambasadori i Mbretërisë së Arabisë Saudite në Tiranë, Shkëlqesia e tij Z. Fejsal bin Gazi Hifdhi.
Reisul Ulema shprehu falënderimet dhe mirënjohjen e tij të thellë për pritjen e përzemërt dhe konstruktive, gjatë së cilës u zhvilluan biseda të frytshme mbi tema të ndryshme me interes të ndërsjellë.
Gjatë takimit, Reisul Ulema shprehu vlerësime e larta mbi Konferencën Ndërkombëtare mbi Haxhin dhe Umren, e organizuar së fundmi në Xheda nga Ministria e Haxhit dhe Umres e Mbretërisë së Arabisë Saudite, nën drejtimin e Shkëlqesisë së tij, Prof. Dr. Teufik bin Feuzan Er-Rebiah të cilit i falēnderoi për ftesēn e tij Reisul Ulemasë.l
Kjo konferencë dëshmoi edhe njëherë nivelin e lartë të organizimit, si dhe strategjitë, teknologjitë bashkëkohore, programet dhe metodologjitë profesionale që Mbretëria e Arabisë Saudite po zhvillon në kuadër të përgatitjeve për Haxhin e vitit 2026.
Në këtë kuadër, u prezantuan qasje të reja inovative që garantojnë një proces gjithnjë e më të lehtësuar dhe të sigurt për haxhilerët, duke u mundësuar atyre kryerjen e riteve me qetësi, dinjitet dhe devotshmëri.
Reisul Ulema theksoi se Mbretëria e Arabisë Saudite tashmë përfaqëson një faktor të rëndësishëm ndërkombëtar, duke qenë shtyllë fuqishme dhe konstruktive në sferën fetare, diplomatike, ekonomike, sociale, kulturore, paqësore dhe humanitare.
Investimet e saj në të gjitha fushat e zhvillimit pozitiv janë të jashtëzakonshme, veçanërisht në promovimin e paqes dhe në ndalimin e konflikteve në rajone të ndryshme të botës.
Në fund të takimit, Reisul Ulema falënderoi përzemërsisht Ambasadorin Z. Fejsal bin Gazi Hifdhi dhe stafin e tij për bashkëpunimin korrekt, të sinqertë dhe miqësor me Bashkësinë Fetare Islame të RMV-së.
Ai njëkohësisht shprehu falënderimet dhe urimet e tij më të sinqerta për Mbretin e Arabisë Saudite, Kujdestarin e Dy Haremeve të Shenjta, Shkëlqesinë e tij Mbretin Selman bin Abdulaziz, si dhe për Trashëgimtarin e Fronit Mbretëror, Shkëlqesinë e tij Princin Muhamed bin Selman, duke iu uruar shëndet, jetë të gjatë dhe suksese të mëtejshme në shërbim të Islamit dhe mbarë njerëzimit.
