Prokuroria Themelore Publike e Shkupit ka hapur hetim ndaj katër personave – dy burra dhe dy gra – për shkak të dyshimit të bazuar se kanë kryer veprën penale Grabitje sipas nenit 237 paragrafi 4 lidhur me paragrafin 1 të Kodit Penal.
Sipas Prokurorisë, më 30 tetor të katërt kanë vepruar si grup dhe me përdorim të forcës fizike i kanë marrë 200 mijë denarë një personi. Ngjarja ka ndodhur në oborrin e një moteli në Shkup.
I dëmtuari fillimisht ka qenë në një dhomë moteli me njërën prej grave të dyshuara, pas çka ajo i ka propozuar të thërrasë edhe një vajzë tjetër. Pas pajtimit të tij, ajo e ka thirrur të dytën, dhe të dyja gratë bashkë e kanë bindur që të shkojnë në një “hotel më të bukur dhe më të lirë”.
Gjatë daljes nga dhoma, në oborrin e errët të motelit, i dëmtuari është pritur nga dy burra që kanë qenë në marrëveshje paraprake me gratë. Ata e kanë sulmuar, duke e goditur me grushta në kokë dhe trup derisa ai ka rënë në tokë. Më pas i kanë marrë paratë, telefonin celular dhe kartën e identitetit.
Prokurori publik ka paraqitur propozim tek gjykatësi i procedurës paraprake në Gjykatën Themelore Penale Shkup për caktimin e masës së paraburgimit për të katër të dyshuarit, për shkak të rrezikut të arratisjes dhe mundësisë së përsëritjes së veprës.
Për njërën nga gratë e dyshuara, e cila është në arrati, masa e paraburgimit do të zbatohet pas gjetjes dhe arrestimit të saj.
