Kryetari i Shoqatës “Jehona e Malësisë” në Miçigen, Agron Dedivanaj, ka shprehur mirënjohjen më të sinqertë për të gjithë pjesëmarrësit në takimin e mbrëmshëm, i cili u shndërrua në një ngjarje me vlera të veçanta diplomatike, kulturore dhe komunitare.
Në fjalën e tij, z. Dedivanaj theksoi se ky takim përbën një dëshmi të qartë të bashkëpunimit të qëndrueshëm ndërmjet institucioneve të Republikës së Kosovës dhe diasporës shqiptare në Shtetet e Bashkuara të Amerikës, me theks të veçantë në Miçigen – qendër historike e organizimit qytetar dhe e përfaqësimit dinjitoz të kombit tonë.
Kryetari Dedivanaj shprehu respekt të lartë për Ministren e Punëve të Jashtme dhe Diasporës të Republikës së Kosovës, znj. Donika Gërvalla-Schwarz, për praninë dhe fjalën e saj frymëzuese.
Sipas tij, vizioni i ministres për një diplomaci bashkëkohore, të bazuar në vlera, profesionalizëm dhe integritet institucional, përbën një orientim të qartë për forcimin e marrëdhënieve ndërmjet shtetit dhe diasporës, si partnerë të barabartë në proceset zhvillimore dhe integruese.
Dedivanaj shprehu gjithashtu falënderim të veçantë për znj. Aferdita Rakipi dhe z. Gjevalin Gegaj për nismën dhe organizimin e takimit nën kujdesin e organizatës “Jehona e Malësisë”, si dhe për përkushtimin e tyre të vazhdueshëm në shërbim të komunitetit dhe të vlerave tona të përbashkëta kombëtare.
Në fjalën e tij, ai shprehu mirënjohje për liderët e të gjitha qendrave fetare – të xhamive, kishës katolike, teqesë bektashiane dhe kishës ortodokse shqiptare – duke theksuar se harmonia ndërfetare që ata përfaqësojnë është pasuri shpirtërore dhe vlerë kombëtare që pasqyron më së miri unitetin e shqiptarëve në diversitetin e tyre.
Dedivanaj falënderoi gjithashtu të gjitha shoqatat e komunitetit shqiptar në Miçigen, si dhe liderët e dalluar të komunitetit shqiptar të Windsor-it, për bashkëpunimin e tyre të ngushtë dhe të sinqertë në ndërtimin e urave të komunikimit mbarëkombëtar.
Ai përgëzoi anëtarët e komunitetit nga fusha të ndryshme profesionale, të cilët me përkushtim dhe vizion dëshmojnë se puna e organizuar dhe bashkëpunimi i sinqertë janë çelësi i çdo suksesi komunitar.
Në vijim, Kryetari Dedivanaj theksoi se vendlindja jonë duhet të shihet jo vetëm si hapësirë emocionale dhe kulturore, por edhe si vend i mundësive të reja ekonomike dhe investuese.
Sipas tij, është koha që kapitali ekonomik i diasporës të orientohet drejt projekteve produktive dhe ndërtimit të partneriteteve të qëndrueshme ekonomike me institucionet e Kosovës dhe Shqipërisë, duke e konsideruar këtë qasje si patriotizmin e ri strategjik – patriotizmin e dijes, punës dhe investimit.
Në përmbyllje, z. Agron Dedivanaj theksoi se takimi i mbrëmshëm dëshmoi se bashkëpunimi ndërmjet institucioneve dhe diasporës shqiptare nuk është vetëm një detyrim moral, por një domosdoshmëri strategjike për të ardhmen kombëtare.
Ai u shpreh se vetëm përmes dialogut të vazhdueshëm, bashkërendimit të politikave dhe aktivizimit të potencialit të diasporës mund të ndërtohet një ekonomi e fortë, një diplomaci e besueshme dhe një identitet i përbashkët shqiptar, i denjë për botën perëndimore.
Në fund të fjalës së tij, Dedivanaj, në emër të Shoqatës “Jehona e Malësisë”, falënderoi të gjithë pjesëmarrësit për praninë, kontributin dhe vizionin e ndarë, duke theksuar se ky takim do të mbetet gur themeli i bashkëpunimit të ardhshëm institucional, kulturor dhe ekonomik ndërmjet Kosovës, Shqipërisë dhe diasporës shqiptare në SHBA dhe Kanada.
