Kandidati për kryetar të Komunës së Vrapçishtit nga radhët e Aleancës Kombëtare për Integrim, z. Isen Shabani, së bashku me ekipin e tij, mori pjesë sot në aktivitetin tradicional “Panairi i Ushqimit”, i organizuar në Shkollën Fillore “Mehmet Pashë Deralla” – Gradec.
Gjatë këtij aktiviteti, z. Shabani u prit nga drejtori i shkollës, z. Bekim Bajrami, si dhe pati mundësinë të bashkëbisedojë me nxënës, prindër dhe mësimdhënës. Panairi u karakterizua nga një atmosferë e ngrohtë, me produkte tradicionale, ushqime të shijshme dhe entuziazëm të madh nga pjesëmarrësit.
“Ky panair është një shembull i bukur i ruajtjes së traditës sonë dhe i bashkëpunimit të ngushtë mes shkollës dhe komunitetit. Arsimi dhe kultura janë themeli i zhvillimit të qëndrueshëm të komunës sonë,” deklaroi Shabani.
Ai falënderoi drejtuesit e shkollës dhe të gjithë pjesëmarrësit për organizimin dhe kontributin e tyre, duke theksuar përkushtimin e tij për të mbështetur arsimin dhe aktivitetet kulturore në komunë.
