Nënkryetari i Bashkimit Demokratik për Integrim (BDI), Arbër Ademi, ka reaguar pas mesazhit të qartë të Bashkimit Evropian lidhur me procesin e integrimit të Maqedonisë së Veriut.
“Bashkimi Evropian foli shumë qartë! Topi është në fushën e qeverisë. Por, në vend që të çojë vendin drejt Brukselit, kjo qeveri po e zhyt në boshtin Beograd–Moskë,” deklaroi Ademi.
Ai theksoi se izolimi në të cilin po rrezikon të futet vendi është pasojë e albanofobisë dhe politikave antievropiane që, sipas tij, po krijojnë ndasi në vend në vend të unitetit për integrim.
“Rruga e vetme përpara është ajo drejt Bashkimit Evropian. Çdo alternativë tjetër është rrezik për stabilitetin dhe të ardhmen e vendit,” shtoi nënkryetari i BDI-së.
Ademi bëri thirrje që qeveria të dëgjojë zërin e qytetarëve dhe të ndërmarrë hapat urgjentë për rikthimin e fokusit në agjendën evropiane.
