Kandidati i Aleancës Kombëtare për Integrim për kryetar të komunës, Blerand Ramadani, së bashku me kryetarin aktual dhe bartësin e listës për këshilltarë Iljas Veseli, si dhe shefin e shtabit komunal Senehat Murtezani, ka zhvilluar një takim me Shoqatën e Pensionistëve dhe Invalidor.
Gjatë takimit, Ramadani prezantoi programin e tij për katër vitet e ardhshme, me theks të veçantë tek përmirësimi i kushteve të jetesës për pensionistët dhe invalidët, si kategori që meritojnë më shumë vëmendje dhe përkujdesje institucionale.
Në takim mori pjesë edhe deputeti i BDI-së, Blerim Bexheti, i cili shprehu mbështetjen e tij për bashkëpunimin me kategoritë më të ndjeshme të shoqërisë dhe theksoi rëndësinë e përfshirjes së tyre aktive në proceset vendimmarrëse.
Përfaqësuesit e shoqatës, nga ana e tyre, kërkuan që në të ardhmen të kenë përfaqësues në Këshillin Komunal, ose të jenë pjesëmarrës aktivë në mbledhje, në mënyrë që zëri i tyre të dëgjohet dhe të merret parasysh.
Kjo kërkesë u mirëprit nga kandidati Ramadani dhe ekipi i tij, të cilët premtuan se do të shqyrtohet me seriozitet dhe do të mundësohet në të ardhmen.
Në fund të takimit, Ramadani falënderoi për mikpritjen dhe besimin e dhënë, duke theksuar se:
“Vetëm së bashku mund të ndërtojmë një komunë më të drejtë dhe më humane.”
