Vrapçisht, më 2 tetor 2025 – Sot u nënshkrua zyrtarisht marrëveshja e bashkëpunimit ndërmjet Aleancës Kombëtare për Integrim (AKI) dhe Partisë Demokratike Turke – TDP, dega e Vrapçishtit.
Ky hap paraqet vazhdimësinë e një bashkëpunimi të frytshëm dhe konstruktiv, i cili ka dhënë rezultate pozitive edhe gjatë periudhës së qeverisjes lokale. Marrëveshja është dëshmi se vetëm përmes unitetit dhe vizionit të përbashkët mund të ndërtohet një e ardhme më e mirë për qytetarët.
Kandidati i Aleancës Kombëtare për Integrim për Komunën e Vrapçishtit, Isen Shabani, theksoi rëndësinë e këtij bashkëpunimi duke nënvizuar se qytetarët do të jenë përfituesit kryesorë:
“Ky është një hap i rëndësishëm për të ardhmen e komunës sonë. Përmes kësaj marrëveshjeje sigurojmë jo vetëm mbështetje për zgjedhjet e 19 tetorit, por mbi të gjitha një zotim të përbashkët për të punuar në shërbim të çdo qytetari, pa dallim”, u shpreh Shabani.
Palët u dakorduan që ky bashkëpunim të jetë i qëndrueshëm dhe të orientohet drejt zhvillimit të komunës dhe mirëqenies së qytetarëve.
