Kandidati i Aleancës pë Kombëtare për Integrim (AKI) për kryetar të Komunës së Tetovës, Bajram Rexhepi, zhvilloi sot një takim me përfaqësues të komunitetit sportiv në qytet, ku u njoh nga afër me problemet që po përjetojnë sportistët, veçanërisht të rinjtë.
Sipas Rexhepit, sporti në Tetovë është bërë viktimë e shantazheve dhe inateve politike nga pushteti aktual, të cilin ai e cilësoi si “klikë që po numëron ditët e fundit”.
“Mbi 900 fëmijë të Ligës së Fëmijëve në futboll detyrohen të shkojnë në Gostivar për të zhvilluar ndeshjet kampionale, vetëm sepse fusha e futbollit te qendra sportive në Tetovë është shndërruar në pronë private nga kjo garniturë keqbërëse,” deklaroi Rexhepi.
Ai shtoi se në programin e tij për Tetovën, sporti zë një vend qendror, duke premtuar:
Ndërtimin e një qendre multifunksionale moderne, terrene sportive të hapura në çdo lagje,
dhe mbështetje të vërtetë për klubet dhe sportistët e rinj.
“Sporti është për fëmijët, si parakusht për një të ardhme të shëndoshë – jo për pazare politike,” përfundoi kandidati i AKI-së.
