Ish ministri i drtejtësisë, Krenar Lloga përmes një postimi në profilin e tij në FB ka reaguar ndaj zëvendës kryeministrit Izet Mexhiti rreth procesit të decentralizimit.
Tregoni ZVKMP-së dhe jo vetëm, se në vend nuk është zhvilluar asnjë proces i decentralizimit, dhe as që ka një nismë të tillë ligjore. Dhënia e disa mjeteve nga kredia hungareze nuk përbën decentralizim, por përkundrazi tregon se vazhdon procesi i centralizimit. Dallimi midis tyre është shumë i madh, si në doktrinë e ligjërim, ashtu edhe në zbatim.
Duhet kuptuar se decentralizimi është transferimi i kompetencave, përgjegjësive dhe burimeve nga pushteti qendror tek pushteti vendor, duke i siguruar këtij të fundit autonomi politike, administrative dhe financiare në zbatimin e programeve dhe menaxhimin e zhvillimit lokal. Ndërsa, ajo që bën qeveria ka të bëjë me zbatimin e politikave të paracaktuara të qeverisë, sëbashkë me mjetet financiare të caktuara e që nuk janë burim i përhershëm i të ardhurave.
Abuzimi ose lajthitja nga ana e eksponentëve shqiptarë në qeverisjen qendrore tregon për nivelin e përgatitjes apo mospërgatitjes profesionale, ose manipulimit për efekte zgjedhore.
P.S. Mjetet që janë ndarë nga kredia hungareze (formula e shperndarjes diskriminoi komunat në Maqedoninë Perëndimore) janë para të marra nga xhepat e qytetarët e RMV-së, e që duhet ti kthejmë ne sëbashku me fëmijët tanë, jo para te vmros apo vasëleve të tyre.
