Kryetari i Komunës së Çairit, Visar Ganiu, ka ndërmarrë një veprim simbolik dhe protestues duke sjellë thasë me mbeturina përpara ndërtesës së Qytetit të Shkupit, përkatësisht para zyrës së kryetares Danella Arsovska.
Ky akt vjen si reagim ndaj, sipas tij, mosreagimit të Qytetit të Shkupit dhe Ndërmarrjes Publike “Higjiena Komunale”, që sipas Ganiut nuk po i përmbushin detyrimet për pastrimin e territorit të Komunës së Çairit.
“Qyteti i Shkupit ka obligim ligjor të kujdeset për pastrimin e mbeturinave në komunat urbane. Kur ne nuk i marrim shërbimet që na takojnë, detyrohemi të reagojmë”, deklaroi Ganiu para mediave.
Ky veprim ka ngjallur reagime të ndryshme në opinion, ndërkohë që qytetarët e Çairit vazhdojnë të përballen me mungesën e rregullt të pastrimit të hapësirave publike.