Barcelona nesër do të jetë mikpritëse e Sevillas, në ndeshjen e vlefshme për javën e 20-të në La Liga. Skuadra e Xavit ka statistika fantastike ndaj andaluzianëve në “Camp Nou” dhe do futet në fushë për marrjen e tri pikëve, tepër të nevojshme për fitimin e titullit.
Barça kryeson kampionatin spanjoll me pesë pikë më shumë se Reali i Madridit, ndërkohë që trajneri Xavi vlerëson shumë Vinicius Junior, një nga yjet e rivalëve nga Madridi, duke ftuar gjyqtarët të ndihmojnë brazilianin dhe talentet si ai.
“Vinicius Junior është një futbollist shumë i mirë në lojën një kundër një, kjo bën që kundërshtarët të jenë agresivë ndaj tij. E njëjta gjë ka ndodhur edhe me Neymarin në të kaluarën.
Gjyqtarët dhe Komiteti i Arbitrazhit duhet të bëjnë mirë punën e tyre për të mbrojtur këta lloj lojtarësh në situata të tilla”, deklaroi trajneri i skuadrës katalanase, i cili shpreson të fitojë La Ligan për herë të parë si trajner.
