Në ZZHTI Shkup sot do të vendoset gurthemeli i fabrikës së kompanisë turke “Shahterm”. Në fillimin e ndërtimit të objektit do të marrë pjesë edhe kryeministri Hristijan Mickoski.
Sipas marrëveshjes së nënshkruar midis Drejtorisë për Zonat Zhvillimore Teknologjike Industriale(ZZHTI) dhe “Shahterm”, vlera e investimit është 100 milionë euro, parashikohet ndërtimi i një objekti me sipërfaqe mbi 13.000 metra katrorë, si dhe hapja e 1.000 vendeve të punës. Investimi do të përfshijë gjithashtu një qendër kërkimore dhe zhvillimi, dhe do të jetë objekti i parë i prodhimit i “Shahterm” jashtë Turqisë.
Kompania “Shahterm” ka më shumë se 40 vjet përvojë në projektimin dhe prodhimin e sistemeve të ngrohjes për teknikë të bardhë dhe elektroshtëpiake. Aktualisht, “Shahterm” është ndër pesë kompanitë kryesore në këtë industri në nivel global, me më shumë se gjysmën e prodhimit të saj vjetor të destinuar për tregje jashtë Turqisë.
Lista e klientëve përbëhet nga prodhues të njohur globalë të teknikës së bardhë dhe elektroshtëpiakeve, si Whirlpool, Amica, Gorenje, Beko dhe Kendall.