Antalya – Një ngjarje e pazakontë ka tërhequr vëmendjen e publikut dhe mediave në Turqi, ku gazetari i njohur nga Tetova, Nevrij Ademi, u bë pjesë e një prej shfaqjeve më mbresëlënëse të iluzionistit me famë botërore Aref Ghafouri. I njohur për performancat e tij spektakolare dhe rrezikshmërisht të guximshme, Ghafouri befasoi të pranishmit duke ftuar në skenë pikërisht Ademin – një fytyrë tashmë e dalluar në gazetarinë shqiptare.
Nevrij Ademi ndodhet aktualisht në një udhëtim turistik në Antalya, i organizuar nga agjencia ETC Travel, dhe është i akomoduar në një nga resortet më luksoze të rajonit, MARCO POLO. Përfshirja e tij në shfaqjen e Ghafourit nuk kaloi pa u vënë re – mediat turke raportojnë për mënyrën spontane, por simbolike, me të cilën iluzionisti vendosi ta përfshinte gazetarin shqiptar në skenë.
Ky moment po bën jehonë jo vetëm për shkak të famës së Aref Ghafourit, por edhe për faktin se Ademi përfaqëson një brez të ri gazetarësh nga Maqedonia e Veriut që tashmë po lë gjurmë edhe përtej kufijve vendorë. Reagimet në rrjetet sociale kanë qenë të menjëhershme, me shumë ndjekës që e kanë përshëndetur këtë moment si “një rast krenarie për gazetarinë shqiptare”.
Shfaqja u mbajt në ambientet luksoze të resortit, ku të ftuarit patën mundësinë të përjetojnë nga afër iluzione të pabesueshme, përfshirë edhe numra me gjarpërinj dhe objekte të mprehta – për të cilat Ghafouri njihet botërisht.
