Në një atmosferë solemne dhe me një program të mirëorganizuar, u mbajt seminari trajnues me haxhilerët e Tetovës për Haxhin 2025. Ky seminar kishte për qëllim informimin dhe përgatitjen shpirtërore e praktike të haxhilerëve rreth urtësive dhe sfidave të këtij udhëtimi të shenjtë.
Myftiu i Tetovës, Dr. Hfz. Selver Xhemaili përshëndeti të haxhilerët, duke u dëshiruar një udhëtim të mbarë dhe kthim me Haxh të pranuar. Myftiu gjithashtu theksoi rëndësinë e durimit gjatë gjithë procesit dhe i inkurajoi haxhilerët që të kultivojnë dashurinë vëllazërore, si vlerë thelbësore për një përjetim të paharrueshëm të Haxhit.
Koordinatori i Haxhit për këtë vit, Nuhi ef. Ganija, gjithashtu iu drejtua të pranishmëve me fjalë përshëndetëse, duke folur për rëndësinë shpirtërore dhe urtësinë e Haxhit si akt adhurimi që afron njeriun me Zotin dhe e pastron shpirtin nga sprovimet e përditshmërisë.
Panelisti kryesor i seminarit ishte hoxha Ibrahim ef. Alija, i cili sqaroi dispozitat dhe praktikat e Haxhit dhe të Umres, duke u ndalur në hollësi mbi ritualet dhe aspektet e nevojshme që duhen ndjekur me përkushtim.
Programi u pasurua edhe me lexim nga Kur’ani Famëlartë nga hoxhallarët Jonus ef. Tairi dhe Vedat ef. Sadiki, të cilët me zërat e tyre të bukur i dhanë një dimension të veçantë shpirtëror seminarit. Me ilahi të përkushtuara për Haxhin, atmosfera u gjallërua nga grupi i njohur “Sytë e Zemrës” nga Tetova (Nuran, Xhelil dhe Bekim Havziu).
Mjekja Gjizveta Havziu u foli haxhilerëve për rëndësinë e kujdesit shëndetësor gjatë qëndrimit në vendet e shenjta, duke i këshilluar që të jenë të përgatitur fizikisht për të përballuar kushtet klimatike dhe fizike të Haxhit.
Moderimi i seminarit u bë në mënyrë të shkëlqyer nga Enes ef. Halili, i cili siguroi rrjedhshmëri dhe organizim të lartë gjatë të gjithë programit.
Në fund, para haxhilerëve u prezantua ekipi udhëheqës që do t’i shoqërojë dhe asistojë gjatë gjithë rrugëtimit të tyre të shenjtë.
