Sot, 25 prill (e xhuma), me ftesë të Muftiut të Muftinisë së Gostivarit, H. Sabahudin ef. Zendeli, Kryetari i Bashkësisë Fetare Islame të RMV – së, Reisul Ulema H. Hfz. Shaqir ef. Fetai, i shoqëruar nga Sekretari Gjeneral, H. Irsal ef. Jakupi, Muftiu i Shkupit, Dr. Qenan ef. Ismaili, Muftiu u Tetovës, Dr. Selver Xhemaili, shefi i kabinetit, Dr. Abdulkerim Iseni, drejtorët e sektorëve të Rijasetit, të mirëpritur nga nikoqirët e këtij aktiviteti, imamët e fshatit Çajle, Hfz. Shekur ef. Halili dhe Mr. Suhejb Halili si dhe qytetarë të shumtë të këtij fshatit, në këtë ditë të bekuar, nën tingujt e tekbireve, me një krenari dhe entuziazëm të lartë shpirtërorë, hapën dyert e Xhamisë së Renovuar të fshatit Çajlë.
Programi, të cilin e moderoi Mr. Mallzim ef. Zendeli, u hap me lexim Kur’ani nga ana e Drejtorit të Diasporës, Mr. Mafiz ef. Rustemi.
Fillimisht, imami i xhamisë, Mr. Suhejb Halili, paraqiti një rrezyme të detajuar në lidhje me ecurinë e punimeve dhe gjitha komponentëve tjerë të cilet kanë kontribuar në kompletimin dhe përfundimin me sukses të kësaj perle të mahnitshme, duke përmendur mes tjerash edhe disa sekuenca inspiruese nga jeta e tij profesionale të ndërlidhura drejtpërdrejt me Reisul Ulema H. Hfz. Shaqir ef. Fetai.
Të pranishmit me fjalë mirëseardhëse i përshëndeti Muftiu i Gostivarit, H. Sabahudin ef. Zendeli, i cili falenderoi prezencën e krerëve më të lartë të Bashkësisë Fetare Islame, të udhëhequr nga Reisul Ulema H. Hfz. Shaqir ef. Fetai. në këtë event kaq të rëndësishëm dhe kuptimplotë për besimtarët e fshatit Çajle.
Fjala e rastit padyshim që i takoi udhëheqësit shpirtërorë të muslimanëve të këtij nënqielli, respektivisht Kryetarit të Bashkësisë Fetare Islame të RMV – së, Reisul Ulama, H. Hfz. Shaqir ef. Fetai.
Reisul ulema pasi falenderoi Zotin e Lartëmadhëruar dhe përcolli bekime mbi Muhammedin a.s., u përkujtoi të pranishmëve ajetin Kur’anor: “…E, xhamia – themelet e së cilës iu vunë që në ditën e parë, në të mirën e Allahut, me të vërtetë, meriton që të bësh namaz në te. Në te, janë njerëzit, të cilët e duan pastërtinë. E, Allahu, i do ata që pastrohen shumë”. (Kur’an: 9:108)
Vlerësuar nga Ajeti Kur’anor, Reisul Ulema H. Hfz. Shaqir ef. Fetai, në vazhdim të fjalës së tij, foli mbi historikun, vlerën, rëndësinë dhe rolin institucional që luan Xhamia në orientimin e besimtarëve drejt Zotit, vlerave të arta Islame dhe kombëtare si dhe afrimin e besimtarëve me njëri tjejtrin. Po ashtu, duke iu referuar ajetit Kur’anor: “Ndër besimtarët ka njerëz që e kanë plotësuar premtimin e dhënë Perëndisë, disa prej tyre kanë vdekur; e disa nga ata e presin atë – nuk kanë ndryshuar asgjë –“ (Kur’an: 33, 23), përgëzoi Imamët e fshatit Çajle, Hfz. Shekur Halili si dhe Suhejb Halili për determinimin dhe sakrificën e tyre në shërbim të fesë dhe kombit, si dhe gjith kontribuesit e fshatit Çajle nga vendi dhe diaspora, për angazhimin dhe përkushtimin e tyre të treguar në renovimin gjithpërfshirës të kësaj Xhamie fascinuese me arkitekturë moderne, duke mos i humbur aspak elementet e arkitekturës klasike Islame.
Duanë e inaugurimit të Xhamisë e bëri Muftiu i Shkupit, Dr. Qenan Ismaili.
Hytben e xhumasë e mbajti referenti i Muftinisë së Tetovës, H. Idriz ef. Idrizi, ndërsa namazit të Xhumasë i priu Muftiu i Tetovës, Dr. Hfz. Selver ef. Xhemaili.
Për fund, nga ana e Reisul Ulema, H. Hfz. Shaqir ef. Fetai dhe Muftiu i Gostivarit H. Sabahudin ef. Zendeli, imamëve të nderuar si dhe këshillit inicues të inaugurimit të Xhamisë iu nda nga një mirënjohje në shenjë falenderimi për punën e tyre të palodhshme.
Allahu ju bekoftë!
