Sot, Kryetari i Bashkësisë Fetare Islame të Republikës së Maqedonisë së Veriut, Reisul Ulema H. hfz. Shaqir ef. Fetai, së bashku me Sekretarin e Përgjithshëm Irsal ef. Jakupi dhe Drejtorin për Diasporë, Mafiz ef. Rustemi, priti në selinë e BFI-së kryetarin e xhamisë “Ymer Prizreni” në Graz të Austrisë, z. Nasuf Memedi.
Gjatë takimit, Reisul Ulema e informoi z. Memedi për aktivitetet dhe projektet e shumta që Bashkësia Fetare Islame i zhvillon në vazhdimësi, e gjithë kjo falë përkrahjes dhe kontributit të madh të besimtarëve si në vend ashtu edhe në diasporë. Ai gjithashtu theksoi edhe përkushtimin e BFI-së për të thelluar më tej angazhimin dhe mbështetjen ndaj diasporës shqiptare, duke përkrahur çdo iniciativë që synon përmirësimin e kushteve dhe promovimin e vlerave islame në mërgatë.
Nga ana e tij, z. Nasuf Memedi falënderoi Reisul Uleman për pritjen dhe mbështetjen e vazhdueshme që BFI u jep xhamive shqiptare në diasporë. Ai shprehu gatishmërinë për të forcuar bashkëpunimin me institucionet fetare, përmes organizimit të aktiviteteve të përbashkëta që do të ndihmojnë në ruajtjen e lidhjeve fetare dhe kulturore mes vendlindjes dhe diasporës.
Në përfundim të takimit, Reisul Ulema H. Hfz. Shaqir ef. Fetai falënderoi përzemërsisht xhaminë “Ymer Prizreni” për kontributin e dhënë përmes dorëzimit të mjeteve të Sadakatul-Fitrit në Bashkësinë Fetare Islame. Ai gjithashtu dhuroi Mirënjohje dhe nga një libër të autorësisë së tij për imamin e xhamisë, Dalip ef. Aliu, si dhe për kryetarin Nasuf Memedi, në shenjë falenderimi për bashkëpunimin dhe përkushtimin ndaj vlerave islame në Austri.
