Sekretariati për Kulturë i Bashkimit Demokratik për Integrim (BDI) ka reaguar ashpër ndaj gjendjes aktuale në sektorin e kulturës, duke e cilësuar situatën si “skandaloze”. Në një deklaratë publike, ky sekretariat thekson se mbi 3000 artistë në vend mbeten pa paga, ndërsa punonjësit e Ministrisë së Kulturës paguhen më pak se në çdo sektor tjetër shtetëror.
“Marrëveshja kolektive e arritur në kohën e BDI-së është shkelur brutalisht. Kjo qeveri as nuk mundet ta zbatojë atë që është firmosur, e lëre më të bëjë diçka më shumë.”, thuhet në deklaratën e publikuar sot.
Sipas BDI-së, të drejtat e garantuara me ligj po nëpërkëmben dhe sektori i kulturës po ndëshkohet me “heshtje dhe varfëri”. Partia kërkon që institucionet përgjegjëse të marrin masa të menjëhershme për të garantuar dinjitetin profesional dhe financiar të artistëve dhe punonjësve të tjerë të kulturës.
Ky reagim vjen në një kohë kur komuniteti artistik gjithnjë e më shumë po ankohet për mungesë mbështetjeje institucionale dhe për pasiguri të vazhdueshme financiare.