Kriza në sektorin e kulturës thellohet çdo ditë, ndërsa mbi 3000 artistë, punëtorë të skenës, muzikantë, aktorë dhe krijues të tjerë janë pa paga për muaj me radhë. Në vend që të japë zgjidhje ose të mbajë përgjegjësi, ministri i Kulturës, Zoran Lutkov, ka zgjedhur heshtjen – një heshtje që buçon më shumë se çdo skenë e zbrazët në teatrot e vendit.
Mosveprimi i Ministrisë ka vënë në pikëpyetje jo vetëm ekzistencën ekonomike të artistëve, por edhe vetë të ardhmen e kulturës në Maqedoninë e Veriut. Ndërkohë që vendi përballet me krizë ekonomike dhe ngecje në rrugën drejt BE-së, kultura – pasqyra e shpirtit të një kombi – po zbehet nën neglizhencën institucionale.