Vizita zyrtare e zëvendëskryeministrit të parë të Maqedonisë së Veriut, Izet Mexhiti, në Turqi ka riafirmuar partneritetin strategjik mes dy vendeve, duke përfshirë takime të rëndësishme me presidentin Rexhep Tajip Erdogan dhe ministrin e Jashtëm, Hakan Fidan. Në fokus të bisedimeve ishin investimet strategjike, zgjerimi i bashkëpunimit ekonomik dhe forcimi i lidhjeve mes Shkupit dhe Ankarasë. Ky angazhim tregon qasjen serioze të Mexhitit në ndërtimin e partneriteteve konkrete dhe rritjen e ndikimit të tij ndërkombëtar.
Në të kundërt, lideri i BDI-së, Ali Ahmeti, vazhdon të mbetet jashtë vëmendjes së Ankarasë zyrtare. Për dekada, ai nuk ka pasur qasje në nivelet më të larta të politikës turke, ndryshe nga Mexhiti, i cili tashmë po konsolidohet si përfaqësuesi kryesor i shqiptarëve në raportet me Turqinë. Kjo situatë është veçanërisht e rëndësishme duke pasur parasysh se Ahmeti, përmes Frontit Evropian, ka në koalicionin e tij edhe partitë politike të komunitetit turk në Maqedoninë e Veriut.
Mospranimi i Ahmetit nga Ankaraja ngre pyetje mbi pozicionin e komunitetit turk në skenën politike vendase. A është ky një mesazh i qartë për ta se ndodhen në anën e gabuar? Duke parë dinamikat aktuale dhe orientimin e Turqisë drejt bashkëpunimit me Mexhitin, nuk përjashtohet mundësia që, sa më afër zgjedhjeve lokale, komuniteti turk të distancohet nga Fronti Evropian dhe t’i bashkohet shumicës në qeveri.
Ky zhvillim shënon një moment të rëndësishëm në politikën shqiptare dhe atë turke në Maqedoninë e Veriut.
