Në një mbrëmje të mbushur me frymë bashkimi dhe solidariteti, Reisul Ulema, H. Hfz. Shaqir ef. Fetai, me ftesë nga Këshilli i Xhamisë “Vizion” në Freiburg të Gjermanisë, mori pjesë në një event e cila ishte organizuar me qëllim për mbledhjen e ndihmave për blerjen e një objekti të ri që do të shërbejë si xhami për muslimanët shqiptar në këtë qytet.
Përkrah Reisul Ulemas ishte drejtori për Diasporë, Mafiz ef. Rustemi, ndërsa në mesin e të pranishmëve ishin edhe Prof. Dr. Musa Musai, drejtori për Diasporë i BIK-ut Ekrem ef. Simnica, kryetari i Këshillit të Bashkësisë Islame të Kaçanikut Fidaim ef. Fazliu, perfaqeues i Unionit të Qendrave Islame në Gjermani, Muhamed Havolli dhe një dhe një numër i konsiderueshëm besimtarësh. I gjithë ky aktivitet u realizua në moderimin e të mrrekullueshmit, Mr. Evzal ef. Sinani,
Në fjalën e tij, Reisul Ulema e përshkroi xhaminë jo vetëm si një vend adhurimi, por si një vatër që ndriçon shpirtrat, bashkon zemrat dhe ruan identitetin e një populli larg atdheut.
“Xhamia është shtëpia e Zotit dhe strehë shpirtërore për secilin prej nesh,” tha ai me një zë që ngjalli emocion në sallë. “Në këtë kohë kur sfidat e jetës moderne na largojnë nga vlerat e vërteta, është detyra jonë të ruajmë lidhjen tonë me besimin, me njëri-tjetrin dhe të mos lejojmë që shejtani të mbjellë ndasi mes nesh.”
Ai theksoi se ndërtimi i një xhamie në diasporë nuk është thjesht një projekt ndërtimor, por një gur themeli në ruajtjen e identitetit fetar dhe kulturor të gjeneratave të ardhshme. Ai i ftoi të gjithë që të kontribuojnë në këtë vepër, duke kujtuar se ndihma e secilit është një investim i përjetshëm në rrugën e së mirës.
Në përmbyllje të fjalës së tij, Reisul Ulema falënderoi të gjithë të pranishmit për mbështetjen dhe përkushtimin e tyre, duke u lutur që Zoti t’i shpërblejë me të mira në këtë dhe në botën tjetër.
Gjatë eventit, edhe ligjeruesit patën mundësinë të ndanin njohuritë e tyre, duke rikujtuar se si xhamia ka qenë gjithmonë një qendër e fuqishme e bashkimit dhe udhëzimit për shoqërinë islame.