Rreth dy milionë qytetarë me të drejtë vote, do t’i drejtohen kutive të votimit për të zgjedhur 120 ligjvënës mes 28 subjekteve politike në zgjedhjet parlamentare, të nëntat me radhë që nga përfundimi i luftës së viteve 1998-1999, që mori fund me ndërhyrjen e NATO-s.
Këto zgjedhje gjithashtu po shihen dhe në syrin e mediave ndërkombëtare, të cilat i kanë kushtuar një vëmendje të madhe.
“Kosova shkon drejt zgjedhjeve të turbullta nga tensionet me Serbinë”, shkruan Reuters, që shton se kandidatët e opozitës do të pëtballen me kryeministrin Albin Kurti, ku në fokus do të jetë ekonomia, korrupsioni dhe marrëdhëniet me “armikun e vjetër të vendit”, Serbinë.
“Votat në zgjedhjet e Kosovës shihen si referendum për kryeministrin Albin Kurti”, shkruan Al Jazeera, duke nënvizuar se këto zgjedhje shihen si konsideruara si një referendum për kryeministrin Albin Kurti, i cili ka qenë në mosmarrëveshje me aleatët e tij perëndimorë për marrëdhëniet me Serbinë.
Gjithashtu AP News e ka kaluar fokusin te marrëdhënia me aleatët perëndimorë dhe te bisedimet me Serbinë, duke shkruar: “Kosova voton për parlamentin e ri pasi ndihma e huaj po pakësohet dhe bisedimet me Serbinë kanë ngecur”.
Guardian nënvizon se: “Kosova shkon në zgjedhje ndërsa hija e Trump duket e madhe”, teksa shton se këto zgjedhje që mund të shënojë një udhëkryq në historinë e vendit dhe madje të përcaktojë integritetin e saj të ardhshëm territorial në një botë gjithnjë e më armiqësore.
Euronews shkruan: “Vendvotimet hapen në të gjithë Kosovën në sfondin e ekonomisë së lëkundur dhe tensioneve etnike” dhe shton se këto zgjedhje do të jenë si një test kyç për Albin Kurtin.
