Drejtori i Diasporës pranë BFI-së, Mafiz ef.Rustemi, ka vijuar me turin e tij të vizitave në xhamitë shqiptare në Zvicër, duke u takuar me imamët, kryetarët dhe xhematet e shumta që janë aktive atje.
-Ai vizitoi Xhaminë e Cyrihut, një nga më të vjetrat në Zvicër, ku Drejtori u takua me imamin Hfz. Nebi ef. Rexhepi, me një përvojë mbi 30-vjeçare në shërbim të komunitetit, imami është një figurë kyçe jo vetëm për Xhaminë e Cyrihut, por edhe më gjerë në diasporë. Gjatë takimit, Drejtori u njoh me historinë e xhamisë, aktivitetet e shumta edukuese dhe shoqërore, si dhe sfidat me të cilat përballet komuniteti.
-Më pas, Drejtori vizitoi Xhaminë e Bülachut, ku u prit nga kryetari, z. Muhamed Alili, xhemati dhe imami i përkohshëm, Kujtim ef. Polloviqi. Gjatë kësaj ndalese, Drejtori mbajti një ligjëratë para xhematit. Ai falënderoi të pranishmit për punën dhe përkushtimin e tyre në rritjen e fjalës së Allahut dhe forcimin e lidhjeve brenda komunitetit.
-Për namazin e xhumasë, Drejtori u ndal në Xhaminë “Tulipan” në Reinach, ku u prit nga imami i xhamisë, Mr. Halil ef. Ademi, dhe këshilli i xhamisë. Pas një bashkëbisedimi të ngrohtë me xhematin, Drejtori mbajti edhe ligjëratën e xhumasë. Ai foli për rolin e muslimanëve në vendet ku jetojnë dhe veprojnë, duke theksuar rëndësinë e të qenit shembull i mirë në shoqëri, me sjellje dinjitoze dhe vlera morale që përkojnë me mësimet islame.
-Në namazin e jacisë, gjatë së njëjtës ditë xhumaje, Drejtori vizitoi Xhaminë “Drita” në Luzern. Ai u prit nga kryetari, z. Fadil Asani, këshilli i xhamisë dhe një numër i madh xhematlinjsh, si dhe imami i përkohshëm, Nusret ef. Shiti. Gjatë kësaj vizite, Drejtori vlerësoi veprimtarinë edukative, sociale dhe kulturore që realizohet në këtë xhami.
Gjatë takimit në Luzern, Drejtori pati mundësinë të bashkëbisedojë edhe me kryetarin e xhamisë “Uniteti”, haxhi Muja, dhe imamin e përkohshëm të kësaj xhamie, Ejub ef., duke u njohur me aktivitetet që zhvillohen në dobi të komunitetit.
Në të gjitha takimet, Drejtori përcolli selame të përzemërta nga muslimanët e vendlindjes, Bashkësia Islame, dhe Reisul Ulemaja, H. Hfz. Shaqir ef. Fetahi, duke ritheksuar mbështetjen e plotë të institucioneve amë për çdo nismë dhe organizim që forcon lidhjet me atdheun dhe promovon vlerat islame e kombëtare në diasporë.
