Shkëlqesisë së Tij, Presidentit të Republikës së Shqipërisë, Z. Bajram Begaj, Kryeministrit Edi Rama, Kryetares së Kuvendit, Elisa Spiropali, qytetarëve të Shqipërisë dhe të gjithë shqiptarëve anë e mbanë botës, u uroj 28 Nëntorin – Ditën e Pavarësisë së Shtetit shqiptar dhe Ditën e Flamurit tonë Kombëtar.
Që nga Vlora dhe viti 1912, kur shqiptarët edhe në mënyrë deklaratative u bashkuan me familjen e kombeve të lira të Evropës, vazhdojmë të qëndrojmë pranë parimeve, vlerave dhe qëllimeve që u kanë hije kombeve të lashta.
Si shqiptar, jam veçanërisht i kënaqur me përparimin e përshpejtuar të Republikës së Shqipërisë dhe për hapat e saj demokratik drejt Evropës dhe botës.
Duke u bërë anëtare e plotë e NATO-s, që nga viti 2009 dhe me fitimin e statusit të vendit kandidat për anëtarësim në BE, Republika e Shqipërisë po dëshmohet se është një partner i besueshëm dhe një fqinj i mirë, për shtetet përrreth.
Jam i sigurt se edhe në të ardhmën, me politika të përgjegjshme, Shqipëria dhe shqiptarët e rajonit do të vazhdojnë të jenë faktor stabiliteti.
Edhe ne në Malin e Zi, si pjesë e pandashme e trungut kombëtar, por pakicë autoktone në Malin e Zi, kemi kultivuar të njëjtat vlera duke kontribuar për të mirën e vendit ku jetojmë, gjithnjë duke mos harruar rrënjët tona.
Ajo që këtë vit ia shton madhështinë Festës sonë kombëtare, është edhe vendosja e shtatores së Gjergj Kastriotit-Skendërbeut në sheshin që mban emrin e Tij, në Tuz, në Qendrën e Malësisë së Madhe, mu përball Bratilës legjendare, ku u ngrit flamuri kombëtar, për herë të parë pas vdekjes së kryeheroit tonë.
Mirë se na vjen në këtë cep të Shqiptarisë o Ati i kombit!
Gëzuar malësorë, Gëzuar shqiptarë kudo që jeni!
Nikollë Camaj uron 28 Nëntorin: Jam i kënaqur me përparimin e përshpejtuar të Shqipërisë
