HËNA E RE – Tema nga numri i Shtatorit 2024
يَا أَيُّهَا النَّبِيُّ إِنَّا أَرْسَلْنَاكَ شَاهِدًا وَمُبَشِّرًا وَنَذِيرًا وَدَاعِيًا إِلَى اللَّهِ بِإِذْنِهِ وَسِرَاجًا مُنِيرًا
“O ti Pejgamber, Ne të dërguam ty dëshmues, lajmëtar, përgëzues e qortues
dhe me urdhrin e Allahut, thirrës për në rrugën e Tij dhe pishtar ndriçues”. [ AHZAB 45-46]
I nderuari Myfti Sabahudin ef. Zendeli, të nderuar vëllezër e motra, zonja e zotërinj, të nderuar të pranishëm!
Sonte, përkujtojmë ditëlindjen e personalitetit më të madh në historinë e njerëzimit, lindjen e të Dërguarit të Zotit të Madhërishëm, Muhamedit, paqja e Zotit qoftë mbi të.
U lind në këtë botë për të marrë mbi supet e tij misionin e Zotit për t’i shërbyer njerëzimit, për të prezantuar rrugën e shpëtimit dhe formimit të dinjitetit njerëzor, në një kohë të shkatërrimit total të vlerave shpirtërore e morale.
Ardhja e tij në këtë botë bëri kthesën më të madhe në historinë e njerëzimit, erdhi si një shpëtimtar për të definuar njeriun dhe sferat e aktivitetit të tij.
Në errësirën e paparë, ndriçoi si një pishtarë i vërtetë dhe solli parimet që diktojnë dinjitetin, moralin, zhvillimin, përparimin dhe qëllimet fisnike të njeriut dhe gjinisë njerëzore.
Muhamedi a.s. i udhëhequr nga fjalët e Zotit në Kur’anin Famëlartë solli mëshirën ndaj çdo krijese sepse, pikërisht, ky ishte qëllimi i tij – mëshirë për të gjithë botët, sepse të tillë e dërgojë Zoti:
“Ty Muhammed të kam dërguar mëshirë për të gjithë botët”.
I dha kuptim jetës, njeriut, botës për t’u arritur kënaqësia e kësaj bote dhe botës tjetër.
Ai vendosi bazat, shtyllat e fuqishme të njerëzimit:
– Besimi në një Zot që është mbështetja me fuqishme në jetën e njeriut;
– Dija dhe hulumtimi shkencor është i patjetërsueshëm në udhëtimin e njeriut në krijimtarinë e Zotit;
– Morali është lulja më e bukur dhe era më e këndshme e njeriut në shoqëri
– Familja është baza dhe vatra që jep fuqinë jetës në mes njerëzve dhe gjinisë njerëzore;
– Kultivimi i paqes në mes njerëzve është vlera më e madhe që duhet të kultivohet në çdo vend dhe kohë;
– Dashuria ndaj kombit dhe vatanit është nderi më i madh i angazhimeve të njeriut, andaj ai nuk guxon të ngel i shkretë dhe pa shpresë nga migrimi masovik që po i ndodh;
– Shenjtëria e jetës së njeriut është baza e respektit ndaj njëri tjetrit.
Këto dhe shumë parime tjera ardhja e Muhamedit a.s. hapi rrugën e ngritjes së vetëdijes së popujve në botë, solli mbrojtjen e thesareve të kombeve, solli periudhën e humanizmit dhe renesancës në të gjithë botën dhe hapi shtigje të ardhmërisë së njeriut.
Nisur nga kjo, Majkëll Harti kur e vendosi të parin në listën e 100 personaliteteve më me ndikim në historinë e njerëzimit, në mes tjerash tha:
“Alternativa ime e vënies së Muhamedit në krye të listës së njerëzve më me influencë në botë mund ta habisë ndonjë lexues e mund të diskutohet nga të tjerë, por ai qe i vetmi njeri në histori, i cili pati suksesin më të madh, si në aspektin fetar, ashtu edhe në aspektin shekullar.”
Sot, si gjithmonë, po tentojnë të sulmojnë vlerat fetare e shpirtërore duke qenë në shërbim të strategjive të huaja për të zbehur me shpifje të llojllojshme vlerën fe, traditë dhe kulturë, të pavetëdijshëm se besimi është shpirti i çdo një kombi dhe vendi për t’i afruar njerëzit në kultivimin e të mirës, konstruktives, shpirtërores dhe dinjitozes.
Bashkësia fetare islame e RMV është organizatë konstruktive që kultivon vlera shpirtërore për të mirën e të tashmes dhe të ardhmes së popujve në këtë nënqiell.
Është aset i fuqishëm dhe sot paraqet Bashkësi që është prezentë në të gjitha eventet botërore, konferenca, panele shkencore, si dhe e gatshme të prezantoj Islamin në frymën e tij burimore si dhe t’i qaset nga të gjitha aspektet dhe sot paraqet një subjekt serioz dhe stabil shpirtërisht, moralisht dhe materialisht me të gjitha institucionet fetaro-shkencore e gatshme për të ngritur vetëdijen e besimtarëve drejt popujve të përparuar dhe të zhvilluar.
Në fund kam nderë të veçantë që në emër të BFI e RMV dhe në emrin tim të gjithë besimtarëve brenda dhe jashtë vendit t’ju uroj 12 Rebiul Evelin’ ditën kur u lind personaliteti më i madh në historinë e njerëzimit, Muhammedi a s.
Qoftë ky përkujtim një moment shumë i rëndësishëm në ngritjen tonë në çdo sferë të jetës tonë për të mirën tonë dhe për të gjithë njerëzimin.
Zoti Ju bekoftë!