Kërcënimi i zjarreve intensive shfaqet mbi Uellsin e Ri Jugor, pasi temperaturat rekord të pranverës dhe erërat e forta nxisin flakët e më shumë se 60 vatrave që digjen tashmë në shtetin më të populluar të Australisë, kanë paralajmëruar autoritetet.
Disa qytete përgjatë bregut lindor panë temperatura rekord të martën, sipas Byrosë së Meterologjisë të Australisë (BOM). Sidnej, pritet të regjistrojë ditën e tij më të nxehtë të shtatorit të mërkurën, me një temperaturë maksimale prej 35 gradë Celsius.
Meteorologia e lartë e BOM Miriam Bradbury tha se NSW po përjetonte “vapë rekord të shtatorit, kushte të rrezikshme të motit nga zjarri dhe erëra të forta”, në një video të postuar të mërkurën në X, e njohur më parë si Twitter.
Që nga e mërkura pasdite, 65 zjarre po digjeshin në të gjithë NSW, gati një e treta e të cilave ishin të pakontrolluara, tha Shërbimi i Zjarrfikësve Rurale të shtetit (NSWRFS) në një deklaratë në Facebook.
“Është rreziku më i keq me të cilin jemi përballur që nga zjarret e verës së zezë të vitit 2019,” tha komisioneri i NSWRFS Rob Rogers të martën, duke iu referuar sezonit të zjarreve 2019-2020 që vrau dhjetëra njerëz dhe një miliard kafshë dhe djegur mbi 10 milionë hektarë.
Paralajmërimet për NSW vijnë pasi zjarret digjen gjithashtu në Queensland, Tasmania dhe pjesë të Australisë qendrore pranë qytetit turistik të Tennant Creek. Që nga e hëna, zjarri i Tennant Creek kishte djegur më shumë se një milion hektarë tokë në Territorin Verior, sipas autoriteteve.
“Pothuajse i gjithë vendi mund të presë kushte më të thata dhe më të ngrohta se normalja këtë pranverë, kështu që është e rëndësishme që australianët të jenë vigjilentë ndaj rreziqeve lokale të zjarrit gjatë muajve të ardhshëm, pavarësisht vendndodhjes së tyre”, tha CEO i AFAC, Rob Webb.
Australia pret muaj të nxehtë në vijim. Të martën, BOM deklaroi se një ngjarje e motit El Niño ishte duke u zhvilluar, e cila zakonisht rezulton në një pranverë dhe verë më të ngrohtë, më të thatë dhe një rrezik në rritje për zjarre.
“Kjo verë do të jetë më e nxehtë se mesatarja dhe sigurisht më e nxehtë se tre vitet e fundit,” tha Karl Braganza, menaxher i BOM i monitorimit të klimës, sipas degës rajonale të CNN 9News.
BOM parashikon temperatura më të ftohta në NSW për ditët në vijim, me valët e të nxehtit dhe kërcënimet e rrezikut nga zjarri që pritet të lëvizin në veri sesa në perëndim deri në fund të javës.
Top Channel