Ministri i Punëve të Brendshme, Xhelal Sveçla, nuk dha një datë për ekzekutimin e shtesave as kur vizitoi pjesëtarët policorë në shënimin e Ditës së tyre.
Në një nga sheshet e Prishtinës, të mërkurën, ku u ekspozuan pajisjet e Policisë, Sveçla vetëm tha se është duke u punuar në këtë drejtim.
“Policia Kosovës është institucion themelorë i gjithë shoqërisë e shtetit tonë, jo vetëm Policia e Kosovës do të ketë mbështetjen qoftë nga Qeveria qoftë nga institucionet e tjera ka përmirësime dhe po shihen përmirësime në pajisje në mjetet në logjistikën e tyre të përgjithshme ka përmirësime edhe në të ardhurat, por ka hapësirë për të bërë më shumë”, theksoi Sveçla.
E ministrja e Drejtësisë, Albulena Haxhiu, e cila po ashtu mori pjesë në këtë ceremoni, tha se është e rëndësishme që zyrtarëve policorë t’iu ekzekutohen shtesat për rrezikshmëri.
“Unë jam e bindur që kjo çështje do të zgjidhet shpejt, sepse është e drejt e tyre, diçka që u takon me ligj sigurisht që duhet të zbatohet, por për momentin janë çështje që janë duke u trajtuar në komisionin përkatës për këtë qëllim… unë besoj që është jashtëzakonisht e rëndësishme që policia ta ketë edhe rrezikshmërinë duke pasur parasysh sfidat që i kemi”, tha ajo.
E në Sindikatën e Policëve shprehën zhgënjim të madh për moszbatim të ligjit sa u përket shtesave.
“Duke i llogaritur punën dhe specifikat e punës me rrezikshmëri që e bëjnë, i kanë të rrezikuar shëndetin dhe jetën, sepse duhet të veprojë menjëherë aty kudo që e thërrasin dhe kemi statistikat e tjera që na tregojnë se me të vërtetë Policia e Kosovës e meriton shtesën e rrezikshmërisë, kemi 23 policorë që e kanë humbur jetën deri më tani. Kemi 4 mijë raste të lëndimeve që janë lënduar gjatë kryerjes së detyrës zyrtare”, tha Imer Zeqiri, kryetar i Sindikatës së Policis
Përveç problemeve me shtesat, Sipas Zeqirit, zyrtarët policorë përballen edhe me mungesë të veshmbathjes.
Policia e Kosovës ka shënuar të martën 24-vjetorin e themelimit, duke i ekspozuar disa nga pajisjet e saj në sheshin “Skënderbeu”. Gjatë ditës, stacionet policore ishin të hapura edhe për vizita të qytetarëve
