Ministri i Financave, Hekuran Murati, ka thënë se është në dorën e komunave të vendosin nëse duan të falin 100 euro për tatimin në pronë.
Ai ka thënë se Graçanica, Obiliqi, dhe Drenasi janë komunat që kanë miratuar faljen e një pjese të barrës së tatimit në pronë, “ashtu siç e mundëson ligji i ndryshuar për tatimin në pronë”.
“Një mundësi të tillë për të lehtësuar barrën e tatimpaguesve e patën kërkuar pothuajse të gjitha komunat. Tani, u takon komunave të vendosin nëse duan ta shfrytëzojnë këtë mundësi ose jo”, ka theksuar ai.
Murati ka llogaritur sa kanë mbledhur komunat nga tatimi këtë vit duke nënkuptuar se ato kanë mundësi për faljen e tatimit.
“Deri në fund të muajit gusht 2023, nga tatimi në pronë komunat kanë mbledhur mbi 35 milionë euro, që e tejkalon me rreth 500 mijë euro nivelin e mbledhur për komplet vitin 2022. Marrë parasysh këtë performancë të mirë, i inkurajoj edhe komunat tjera që të shfrytëzojnë mundësinë e faljes së një pjese të tatimit në pronë që të lehtësojnë barrën e qytetarëve, para datës 15 shtator 2023, kur edhe përfundon afati ligjor”.
