Qyteti verior i Italisë, Milano regjistroi një temperaturë të re rekord të lartë mesatare ditore prej 33 gradë Celsius të mërkurën, pasi vala e të nxehtit që filloi rreth mesit të gushtit arriti kulmin e saj, sipas Agjencisë Rajonale të Mbrojtjes së Mjedisit.
Kjo ishte dita më e nxehtë që kur stacioni i motit Milano Brera filloi të regjistronte temperatura në vitin 1763. Rekordi i mëparshëm i Milanos prej 32.8 C u vendos më 11 gusht 2003, sipas Reuters.
Kryeqyteti italian Roma regjistroi një rekord prej 41.8 gradë Celsius në korrik, pasi pjesa më e madhe e Evropës Jugore u përball me temperatura rekord këtë verë, duke nxitur qeveritë të lëshojnë paralajmërime dhe duke ndërprerë pushimet për shumë turistë.
ARPA tha në një deklaratë se 23 dhe 24 gushti kanë qenë ditët më të nxehta të verës në të gjithë rajonin e Lombardisë që rrethon Milanon, me disa qytete që regjistrojnë temperatura maksimale mbi 40 gradë C.
Ai shtoi se temperaturat “intensive dhe jonormale” goditën gjithashtu Alpet italiane.
Megjithatë, vala e të nxehtit është gati të përfundojë, tha agjencia, duke i lënë vendin stuhive të forta dhe një rënie të mprehtë të temperaturave deri në 10-15 gradë C në fillim të javës së ardhshme.
Top Channel