Ish diplomati Blerim Canaj ka kritikuar Presidenten e Kosovës, Vjosa Osmani-Sadriu për takimin me ambasadorin e Francës, Olivier Guerot, në ambasadën franceze këtë të premte që u përshkrua si takim pune nga presidenca.
Canaj e ka quajtur si gabim nga ana e shefes së shtetit, meqë sipas tij nuk shkon një presidente e vendit të takojë një ambasador.
“Në diplomacinë tonë skandalet tanimë kanë kaluar në normalitet! “ thotë ish diplomati Canaj e nisi kritikën e tij duke e cilësuar si një skandal që në fillim duke argumentuar se kjo huqje është edhe një dëshmi e paaftësisë.
“Me siguri që keni dëgjuar që presidenti e viziton një president në shtetin e tij! Po edhe se dy presidentë u takuan në presidencë por kurrë në një ambasadë! Apo a keni dëgjuar ndonjëherë të thuhet që presidenti e vizitoj një ambasador? Nuk e besoj! Por me siguri keni dëgjuar të thuhet „Presidenti e ftoj ambasadorin për të biseduar për […]! .Presidenti pret përfaqësues diplomatik në Presidencë dhe asnjëherë në hapësira të ambasadës, sepse ambasada është territor i shtetit tjetër. Në këtë rast, presidentja në territorin e Francës ka takuar të dërguarin e Makron! “
Sipas Canajt me këso veprimesh po dëmtohet imazhi i Kosovës.
“Njejtë sikurse që pati shkuar në Kalabri pa e takuar fillimisht presidentin Matarela. Këto sjellje jo shtetërore tashmë e kanë përulur imazhin e Kosovës në nivel të organizimit tribal e institucionet tona po e humbin ndjenjën e të qenit shtet. Mosdije apo qëllim! Për mosdije tanimë po e dijmë, por shpresojmë të mos jetë e qëllimshme! Narcisoizmi në piedestal!”.
Presidenca ka njoftuar sot në komunikatë se presidentja Osmani ka takuar ambasadorin francez Guerot për një takim pune siç u cilësua. Aty kanë disktuar kryesisht për çështjet e dialogut me Serbinë dhe janë pajtuar për nevojën e zbatimit të Marrëveshjes së Ohrit dhe Brukselit.