Presidentja Vjosa Osmani nuk do ta dekretojë Ligjin për pagën minimale pa vendim të Gjykatës Kushtetuese, ka njoftuar këshilltari për media i Presidencës, Bekim Kupina.
Të premten, Aleanca për Ardhmërinë e Kosovës e çoi në Kushtetuese Ligjin për pagën minimale, duke kërkuar shqyrtim shtesë.
“Rrjedhimisht, presidentja Osmani nuk do ta nënshkruajë këtë ligj, përpara se të kryhet shqyrtimi në Kushtetuese”, ka thënë Kupina.
Ligjin për pagën minimale ka kaluar në Kuvend në atë që njihet si “seanca e dajakut”. Pa deputetët e opozitës, Ligji u miratua në lexim të dytë në Kuvend me deputetët e pushtetit.
Por pas miratimit, të parët reaguan veteranët e UÇK-së që nuk u përfshin në Ligj. Ata madje mbajtën një protestë tre ditë pas miratimit të Ligjit. Kanë paralajmëruar se do ta bllokojnë punën e Kuvendit nëse Ligji dekretohet nga presidentja. Ata u takuan edhe me presidenten Osmani më herët gjatë javës.
