Sot është duke e mbajtur seanca e fundit për këtë sezon në Kuvendin e Shqipërisë, gjersa jashtë kuvendit studentët e mjeksisë janë duke protestuar me moton “Mos prangosni duart që shërojnë”.
Rendi i ditës parashikon raportimin e disa institucioneve për veprimtarinë e vitit të shkuar ndërsa pritet të kalojnë ligje që kanë hasur jo pak kundërshtime nga opozita.
Në seancë pritet të kalojnë disa projektligje të rëndësishme si ai për legalizimin e kanabisit dhe ligji për studentët e mjekësisë të cilët kanë nisur një protestë në dyert e ambienteve të parlamentit.
Me pankarta në duar studentët kundërshtojnë projektligjin e qeverisë për t’i detyruar të punojnë për një periudhë 5-vjeçare brenda vendit në mënyrë që të mund të pajisen me diplomën e shkollës së lartë.
“Duart që shërojnë nuk duhet të prangosen”, lexohet në një nga pankartat e studentëve.
Paralel me protestat, ata kërkuan përmes një shkrese zyrtare, të marrin pjesë në seancën plenare dhe të dëgjohen në Kuvend.
