Ende nuk dihet se kur do të dorëzohen ndryshimet kushtetuese në Kuvend. Sipas Ministrit të Jashtëm, Bujar Osmani një gjë e tillë mund të bëhet vetëm pasi të shteren të gjitha mundësitë që procesi të jetë konsensual. Osmani thekson në VMRO-DPMNE ekziston një grup i njerëzve që besojnë se këto ndryshime janë më se të nevojshme, por nuk precizon nëse bëhet fjalë për deputetë.
“Do të thotë një vijë ideologjike në VMRO-DPMNE të cilët i kuptojnë pasojat nga izolimi i shtetit dhe hyrje në rrugën e dytë. Edhe njëherë po e potencoj, ka dy rrugë. Rruga e shpejtë dhe rruga e shteteve me çështje të hapura. Nga votimi do të varet se në cilën rrugë do të hymë ne. Dalëngadalë po shterohen mundësitë që të bindet VMRO-DPMNE-në, por nuk janë shteruar plotësisht. Prandaj ne do të punojmë me këtë vijë ideologjike që e do këtë shtet dhe të ardhmen e këtij shteti, që e sheh si vendin si shtet europian, demokratik.”- deklaroi Bujar Osmani, minsitër i Punëve të Jashtme.
E nga VMRO-DPMNE ripërsërisin qëndrimin e tyre se askush nga ta nuk i mbështet ndryshimet kushtetuese nën diktat bullgar, ndërsa i bënë thirrje ministrit që nëse është aq i sigurt të propozojë ndryshimet në kuvend. Bujar Osmani dhe BDI ta shikojnë oborrin e tyre dhe të mos de fokusojnë opinionin, duke u munduar të krijojnë probleme aty ku nuk ka.
Nga ana tjetër edhe sekretari i përgjithshëm i LSDM-së Mile Zeçeviq ka treguar se ka bisedime të vazhdueshme me VMRO-DPMNE-në në disa nivele.
“Dora e zgjatur e LSDM-së është e sinqertë dhe ka një qëllim – të mirën e vendit. Pas takimit të liderëve LSDM formoi grup punues, e thamë publikisht, çdo ditë e inkurajojmë VMRO-në të kyçet. Ka kontakte të rregullta me kolegët e VMRO-së për tema të ndryshme, qofshin ato që kanë të bëjnë me punën e Kuvendit, me zgjidhje të caktuara ligjore, rregullime, ka dialog përmes grupeve punuese për ndryshimet në kodin zgjedhor e kështu me radhë. Tani shtrohet pyetja publikisht dhe për temën më të rëndësishme, anëtarësimin në BE, pse të mos ulemi në tavolinë dhe të vazhdojmë dialogun?”- tha Mile Zeçeviq.
Por edhe përkundër zërave se VMRO është e unifikuar në qëndrimin e saj, Osmani foli me tone optimiste në pres konferencën e sotme që u mbajt me rastin e kryesimit të Maqedonisë së Veriut të Procesit të Bashkëpunimit të Europës Juglindore për çka kryediplomati thotë se është format shumë i rëndësishëm duke qenë se përfshinë 13 shtetet e Europës Juglindore.
