“Iniciativa ‘Ballkani i Hapur’ ka përfunduar”, kështu deklaroi sot kryeministri i Shqipërisë, Edi Rama, në një intervistë të dhënë për ‘Euronews Albania’ nga Ulqini, aty ku ishte ftuar në koncertin e tenorit Ramë Lahaj dhe për aktivitete të tjera. Ai tha se nisma e ka kryer misionin e saj për të çuar përpara ‘Procesin e Berlinit’. Rama shtoi se planifikon të bëjë takime me gjithë kryeministrat dhe presidentët në rajon për të folur mbi këtë proces dhe për t’iu kërkuar kohezion e bashkëpunim. Çështja e Kosovës ishte ajo ku u ndal më shumë. Rama tha se plani franko-gjerman është oferta më e mirë e mundshme që duhet të shtyhet para dhe të detyrohet Serbia që ta pranojë. Sipas tij, plani franko-gjerman s’mund të qëndrojë aty për gjithë jetën dhe kryeministri i Kosovës nuk mund ta fitojë këtë betejë diplomatike vetëm si Don Kishot.
