Kryeministri i Kosovës, Albin Kurti ka vizituar sot Bashkësinë Islame të Kosovës me rastin e festës së Kurban Bajramit, ku është pritur nga myftiu Naim Tërnava.
Kurti uroi të gjithë besimtarët myslimanë për festën e Kurban Bajramit.
“Për festën e Kurban Bajramit vizitën e parë e bëmë në Bashkësinë Islame për t’ia uruar myftiut Tërnava dhe bashkësisë së tij, për t’i falënderuar për rolin që e kanë luajtur në vazhdimësi. Të mirat duke i ndarë shtohen, pasi duke i ndarë bëhen të mira për të gjithë. Edhe mirëqenien duhet ta ndajmë e sakrifica ia vlen e nuk ka ditë më të përshtatshme për ta konkretizuar këtë se sa festa e Kurban Bajramit. Urime të gjithë besimtarëve”, ka thënë Kurti.
Kryeministri i vendit gjatë bisedës me myftiun Naim Tërnava bëri të ditur se do t’i vizitojë edhe policët e liruar të hënën, pasi ishin arrestuar nga forcat serbe në territorin e Kosovës. /Telegrafi/
