Klubet e Arabisë Saudite kanë nisur të investojnë fuqishëm në merkato.
Ai që çeli lëvizjet e bujshme drejt Lindjes së Mesme ishte Cristiano Ronaldo që u transferua te Al-Nassr, ndërsa tashmë është mbyllur edhe transferimi i Karim Benzema te Al-Ittihad.
Objektivi i radhës është Lionel Messi, ndërsa së fundmi në skenë del edhe emri i një Kampioni Bote si N’golo Kante.
Emisarë arabë të klubit të Al-Ittihad kanë mbërritur në Londër për t’i paraqitur një ofertë zyrtare mesfushorit teksa besohet shifra që do t’i ofrohet Kante si pagë sezonale, arrin në shumën e 100 milionë eurove, ku të përfshira janë edhe të drejtat e imazhit.
Në fakt, Kante i dha prioritet rinovimit të kontratës me Chelsean dhe palët ishin pranë marrëveshjes në muajin mars, por një dëmtim i lojtarit bëri që drejtuesit anglezë të tërhiqeshin. Kështu, Al-Ittihad përfitoi dhe është shumë pranë transferimit të Kante që së bashku me Benzema do t’i shtonte edhe më shumë prestigj kampionatit arab.
/BotaSot/