Bashkimi Evropian ka dënuar veprimet e dhunshme kundër qytetarëve, KFOR-it, policisë e mediave në veri të Kosovës. Ai ka thënë se “dhuna mund të evitohej dhe duhet të evitohet në të ardhmen”.
BE-ja u ka kërkuar Kosovës dhe Serbisë që menjëherë dhe pa kushte të ndërmarrin masa “për depërshkallëzim, të ndalojnë retorikën përçarëse dhe veprimet e mëtejme të pakoordinuara”.
“Bashkimi Evropian është i gatshëm të zbatojë masa të rrepta. Dështimi për t’i ulur tensionet do të rezultojë me pasoja negative”, thuhet në deklaratën e BE-së.
BE-ja ka shtuar se pret që Kosova menjëherë të pezullojë operacionet policore në afërsi të objekteve komunale në veri dhe që kryetarët e zgjedhur të kryejnë funksionet nga objekte alternative.
“Zgjedhjet e jashtëzakonshme duhet të shpallen sa më shpejt që të jetë e mundur në të katër komunat, dhe ato të organizohen në mënyrë gjithëpërfshirëse. Presim që serbët e Kosovës të marrin pjesë”.
Teksa, ka shprehur shqetësimin mbi ngritjen e gatishmërisë së ushtrisë serbe.
“Bashkimi Evropian, pret nga Kosova dhe Serbia të veprojnë me përgjegjësi dhe të angazhohen menjëherë në dialogun e lehtësuar nga BE-ja, për të gjetur zgjidhje për situatën në veri, që garanton siguri dhe pjesëmarrje për të gjithë qytetarët. Diçka e tillë hap rrugë për zbatimin e Marrëveshjes për rrugën drejt normalizimit dhe aneksit. Kjo përfshin edhe nisjen, pa asnjë vonesë tjetër, dhe pa parakushte të punës për të themeluar Asociacionin e komunave me shumicë serbe”, është thënë mes tjerash në thirrjen e bllokut evropian.