Zëvendëskryeministri i parë, Artan Grubi ka reaguar në lidhje me situatën në veri të Kosovës, përcjell TV 21. Grubi thotë se pavarësia dhe integriteti territorial i Kosovës është realitet i pakthyeshëm, ndërkaq apelon te autoritetet e Kosovës që të koordinohen me SHBA-të dhe BE-në.
“Situata në Veri të Kosovës ka ngjallur këto ditë shqetësim të madh ndër ne dhe te mbarë faktori ndërkombëtar. Dënoj ashpër protestat e dhunshme dhe sulmin ndaj forcave të KFOR-it duke apeluar për rikthim të dialogut për normalizimin e marrëdhënieve në frymën e marrëveshjeve të Brukselit dhe të Ohrit. Ftoj autoritetet e Kosovës të vazhdojnë koordinimin me përfaqësuesit e Bashkimit Europian dhe Shteteve të Bashkuara të Amerikës, aleatët tanë të përhershëm, duke pasur gjithmonë në mendje se pavarësia dhe integriteti territorial i Kosovës është realitet i pakthyeshëm dhe zgjidhja e vetme është njohja reciproke midis Kosovës dhe Serbisë”, shkruan Grubi.