Forcat e armatosura të Serbisë mbeten në nivelin më të lartë të gatishmërisë luftarake, ky ishte vendimi i marrë nga mbledhja e Këshillit të Sigurisë në Serbi, që u zhvillua pas situatës së tensionuar në veri të Kosovës.
Media serbe “Tanjug”, shkruan se gjatë takimit u ra dakord për të gjitha aktivitetet e nevojshme të sigurisë me qëllim të forcimit të kapaciteteve mbrojtëse të Serbisë.
“Republika e Serbisë do të jetë e vendosur dhe e palëkundur në mbrojtjen e popullit të saj”, ka thënë Presidenti serb, Aleksandër Vuçiq.
Të premten (26 maj) marrja e detyrës nga kryetarëve të rinj të 3 komunave në veri të Kosovës ka hasur në rezistencën e serbëve lokalë, të cilët nuk i pranojnë si të përzgjedhurit e tyre. Për këtë arsye, është dashur edhe ndërhyrja e policisë, ku pesë efektivë të Kosovës kanë mbetur të plagosur. Për të shpërndarë protestuesit Policia përdorur edhe gaz lotsjellës.
Kryeministri i Kosovës, Albin Kurti reagoi këtë të shtunë, duke ftuar qytetarët, veçanërisht ata serbë të Kosovës që të bashkëpunojnë me kryetarët e rinj të komunave. Në përgjigje të reagimeve nga partnerët ndërkombëtarë, Kurti tha se nuk kishin zgjidhje tjetër pasi një veprim ndryshe do të ishte mos përmbushje e obligimeve kushtetuese të Qeverisë ndaj kryetarëve të rinj.
Për këtë situatë reaguan edhe Shtetet e Bashkuara të Amerikës e BE të cilët dënuan sulmet dhe kërkuan ndërprerjen e masave të dhunshme. NATO kërkoi që institucionet e Kosovës të shtensionojnë menjëherë situatë, duke bërë thirrje për dialog mes palëve.