Gjenerata e re e Mercedes E-Class është gati. Prodhuesi gjerman muajin e shkuar e shpalosi sedanin e ri, duke treguar modelin e ridizajnuar. E-Class me katër dyer do ta ketë megjithatë edhe një version të veçantë, bëhet fjalë për “All-Terrain” (version i fuqishëm, më i lartë se normalja e me veshje plastike dhe tërheqje me katër rrota). Fotografitë e reja tani kanë nxjerrë në pah se si mund të duket kjo veturë.
Foto: Render
Në parashikimet e mediave të specializuara në automobilizëm, Mercedesi po planifikon t’i sjellë grilë shumë më të madhe modelit të ri. Ndryshimet pritet të jenë edhe në pjesën e pasme me kulm të zgjatur. Padyshim shtesat nga kromi do ta bëjnë dallimin po ashtu.
Sipas patentës në Shtetet e Bashkuara të Amerikës, kjo veturë do të dalë në treg më 2024. Dokumenti ka treguar se ai do të ketë motor E450, që ka 375 kuajfuqi e funksionon edhe me asistencë hibride.
E-Class All-Terrain në treg do ta rivalizojë A6 Allroad të Audit, tjetër model me kulm të gjatë e që ka motor 3.0-litërsh me 335 kuajfuqi.
Mercedesi ende nuk e ka shpalosur strategjinë se kur do ta prezantojë variantin e ri, por dokumentet kanë thënë se do të dalë në treg vitin e ardhshëm.
E-Class All-Terrain i ri do të kushtojë rreth 70 mijë dollarë kur të dalë në treg.