Në mediat kosovare u raportua se stilisti i njohur Valdrin Sahiti u arrestua të mërkurën në Aeroportin e Stambollit. Sipas mediave kosovare, Sahiti dyshohet për veprën penale blerja, pranimi dhe posedimi i drogërave.
Sipas të njëjtave raportime, policia turke ka njoftuar Policinë e Kosovës se Valdrin Sahiti është kapur me pasaportë diplomatike të lëshuar nga Republika ne Kosovës.
Stilisti ka shfrytëzuar statusin e diplomatit për të kaluar në zonën VIP të aeroportit të Stambollit, mirëpo pas dyshimeve të policisë turke ai është kapur në flagrancë dhe gjatë kontrollit i është gjetur drogë. Menjëherë pas kësaj Vadrin Sahiti është arrestuar nga autoritetet turke.
Sahiti është pajisur me pasaportë diplomatike në vitin 2020 me rekomandim të ish-ministres së jashtme të Kosovës Melisa Haradinaj.
Ndërkaq, sot në profilin e tij në Instagram Sahiti ka shpërndarë një fotografi gjatë paradites. Autoritetet kosovare ende nuk kanë dalë me njoftim zyrtar për rastin.
