Kryeministri i Federatës së Bosnje e Hercegovinës, Fadil Novalliç dënohet me katër vjet burg për keqpërdorim të fondeve gjatë periudhës së pandemisë së COVID.
Gjykata në Bosnje e Hercegovinë shpalli dënimin e shkallës së parë kundër Novalliçit më 5 prill, ashtu si edhe kundër të të pandehurve të tjerë në këtë rast, kreut të suspenduar të Mbrojtjes Civile të Federatës së Bosnje e Hercegovinës, Fahrudin Sollak, dhe pronarit të kompanisë bujqësore “Srebrena Malina”, Fikret Hoxhiç.
Sollak u dënua me gjashtë vjet burgim dhe Hoxhiç me pesë. Kompania “Srebrena Malina” gjithashtu do të duhet të paguajë kompensim në vlerë prej 100 mijë eurosh.
Novalliç nuk u paraqit në seancën e dhënies së dënimit.
Ai është akuzuar se ka hartuar një plan për të përdorur para nga buxheti i vitit 2020 për blerjen e mjeteve dhe pajisjeve për të luftuar koronavirusin.
Bashkë me Sollakun dhe Hoxhiçin do të siguronin përfitime materiale që më pas do t’i ndanin mes njëri-tjetrit.
Ministrja e Financave, Jellka Miliceviç është liruar nga akuza se nuk i ka penguar ata që ta bëjnë një gjë të tillë.
Gjyqi për blerjen e 100 ventilatorëve nga Kina, me vlerë 5.4 milionë euro, për nevojat e sistemit shëndetësor në Federatën e Bosnje e Hercegovinës, ka filluar më 23 shkurt, 2021.
Respiratorët janë blerë në prill të vitit 2020, një ditë pas shpalljes së gjendjes së jashtëzakonshme, për shkak të pandemisë COVID-19.
Prokuroria e Kantonit të Sarajevës ka nisur hetimet pasi është bërë e ditur se puna është kryer pa tender dhe me marrëveshje të drejtpërdrejtë me kompaninë private “F.H. Srebrena Malina”, e cila merret me tregti të pemëve dhe perimeve.
Prokuroria e Shtetit e ka marrë më pas dokumentet nga Prokuroria Kantonale dhe aktakuza është konfirmuar në fund të vitit 2020.