Berat Gjimshiti është një prej lojtarëve të Kombëtares shqiptare që luan në nivelin më të lartë të futbollit të Evropës, Serie A. Por mbrojtësi i Atalantas nuk e ka harruar për asnjë moment vendin e tij të origjinës. Së fundmi Gjimshiti ka vendosur të japë një shumë të konsiderueshme për familjet në nevojë në Luginën e Preshevës. Këtë e ka bërë duke kontribuar në Fondacionin Humanitar “Spektri dhe Miqtë”.
“Zoti i shpërbleftë të gjithë bamirësit. Nuk e shohim të nevojshme ta përshkruajmë kush është Berat Gjimshiti, sepse nuk besojmë që ekziston shqiptar që nuk din për yllin Tërnocas, futbollist i Kombëtares kuqezi. Por, me kënaqësinë më të madhe po ju njoftojmë se Berat Gjimshiti i dhuroi një donacion financiar të konsiderueshëm Fondacionit Humanitar “SPEKTRI DHE MIQTË” që do t’i dedikohet familjeve skamnore me nevoja të veçanta të Luginës së Preshevës. Jo vetëm kaq, tash e tutje autoriteti i Beratit do të shfrytëzohet në Referencën e Fondacionit për aplikim edhe te Donatorët e huajë”, shkruhej në reagim.
