Në vitin 2022, inflacioni në BE arriti nivelin më të lartë të matur ndonjëherë në 9.2%. Krahasuar me vitin 2021, kur vlera vjetore ishte 2.9%, norma e inflacionit është rritur për më shumë se trefish, raporton Eurostat, transmeton bild.mk .
Krahasuar me disa nga ekonomitë më të mëdha të botës, inflacioni vjetor në Shtetet e Bashkuara të Amerikës arriti në 8.7% vitin e kaluar, në Japoni 2.5% dhe norma më e ulët u regjistrua në Kinë me 2.0%.
Rritja më e madhe e çmimeve në BE në vitin 2022 është për kostot e strehimit dhe ushqimit. Vitin e kaluar, çmimet e konsumit për banesa, ujë, energji elektrike, gaz dhe lëndë tjera djegëse shënuan rritjen më të lartë prej 18.0%. Pason transporti me një rritje mesatare prej 12,1% , ushqimet dhe pijet joalkoolike u rritën mesatarisht me 11,9%.
Në Maqedoninë e Veriut, megjithatë, sipas të dhënave të Entit Shtetëror të Statistikave, inflacioni në vitin 2022 ishte 14,2 për qind, ndërsa indeksi i çmimeve me pakicë u rrit për 12,6 për qind. Rritjen më të madhe të indeksit të kostos së jetesës vitin e kaluar e shënuan ushqimet dhe pijet joalkoolike, të cilat në një vit u rritën me 20.9 për qind. / bild.mk
