Vendosëm të bëhemi pjesë e shumicës parlamentare pasi kështu japim mundësi për t’u krijuar numrat e nevojshëm për kalimin e ndryshimeve kushtetuese. Kështu e arsyeton vendimin e kyçjes së ASH-në në Qeveri, Isen Shabani – Sekretar Organizativ i këtij subjekti dhe kryetar i Komunës së Vrapçishtit.
Ai në emisionin “Politica” në Tv Globi tha se vendimi është ndikuar që të bëhen pjesë e ekzekutivit edhe për të marrë përgjegjësi që vendi të ecë më shpejtë në rrugën evropiane.
“Ne mund ta mbështesnim qeverinë e pakicës, por nuk deshëm që të na akuzonin se si opozitë bashkëpunojmë me atë qeveri. Prandaj, vendosëm që të marrim përgjegjësi dhe tani kur kemi marrë përgjegjësi që duhet ta ndihmojmë këtë proces të ndryshimeve kushtetuese në afat prej dhjetë muajsh. Ne kështu japim shans që të bëhen numrat për ndryshimet kushetetuese, pasi po të zgjidhnim të mbetemi në opozitë, ajo do ishte më e lehtë por do kishim krizë dhe ndoshta do të shkonim në zgjedhjet të parakohshme parlamentare, rrugë tjetër nuk mbetej”, deklaroi Shabani.
Ai shpreh bindjen e tij se deputetët e VMRO-DPMNE-së do ti përkrahin ndryshimet kushtetuese.
“Me shumë gjasa po, ne kemi shpresë dhe punojmë në këtë drejtim. Besoj se edhe te partia më e madhe maqedonase e cila e krijon ngërçin më të madh, do të ketë deputetë që do ti përkrahin ndryshimet kushtetuese”, shtoi Shabani.
I pyetur prej nga kjo bindje, Shabani tha se këtë e duan vetë disa nga deputetët e partisë së Micksokit.
“Kur flasim në kryesi të partisë, deputetë tanë tregojnë se kanë komunikim me të gjithë kolegët e tyre nga subjektet e tjera politike, por konkretisht tash kur flasim për deputetë e VMRO-DPMNE-së, ata thonë se ka një vullnet ku ndoshta ata tani në një periudhë shumë të shkurtër do të jenë në idenë që do i mbështesin ndryshimet kushtetuese, edhe pse ato tani nga lideri i tyre kanë një shtypje. Kuptohet ai ka një presion nga ajo që ka thënë më herët dhe nuk di si të dalë nga ajo situatë, por ai këtë më tepër e bën për marketing politik”, theksoi Shabani.
Shabai thotë se deri në fund të vitit ndryshimet kushtetuese do të kalojnë.
Shabani: Deputetët e VMRO-DPMNE në një periudhë shumë të shkurtër do të mbështesin ndryshimet kushtetuese
