Kampionati i Prince Caffe Superligës së Kosovës në basketboll vazhdon me ndeshjet e javës së 25-të. Dy ndeshje zhvillohen të shtunën, po aq të dielën dhe një të hënën.
Java hapet me përballjen ndërmjet Pejës dhe Vëllaznimit. Verdhezinjtë janë këndellur me trajnerin e ri izraelit, ndërsa këtë edicion numërojnë 17 fitore e shtatë humbje, ndërsa kuqezinjtë që synojnë “play-off”-in, kanë tetë fitore e 16 humbje.
Dueli i dytë i sfidës së shtunës është ndërmjet Rahovecit dhe Bashkimit. Vreshtarët ndodhen në vendin e fundit me tri fitore e 21 humbje, kurse prizrenasit kanë 11 fitore e 13 humbje në pozitën e pestë.
Të dielën përballen kampioni Golden Eagle Ylli dhe Ponte Prizreni, që nuk po kalon në formë të mirë në ndeshjet e fundit. Therandasit kanë 17 fitore e shtatë humbje, ndërsa e kundërta është me prizrenasit që kanë shtatë fitore e 17 humbje.
Të hënën takohen rivalët e vjetër Sigal Prishtina dhe Trepça. Këto dy skuadra përveç që janë ndeshur tri herë gjatë garave të rregullta janë përballur edhe në dy finale. Prishtinasit i mundën në Superkupë, kurse mitrovicasit iu kundërpërgjigjën për Kupë. Bardhekaltrit janë në vendin e parë me 18 fitore e gjashtë humbje, kurse ‘Xehetarët’ janë në vendin e katërt me 15 fitore e nëntë humbje.
The post Vëmendja te klasikja e basketbollit në Kosovë appeared first on SHQIP.com.