Pas fitores që PSG e arriti ndaj Lille me shifrat 4-3, lojtarët e skuadrës kryeqytetase morën disa ditë pushimi. Lionel Messi zgjodhi të udhëtonte me familjen në Barcelonë.
Kjo nuk është asgjë e pazakontë për të, sepse shtëpia e tyre është në Barcelonë dhe shpesh shkojnë në këtë qytet kur kanë kohë të lirë. Gjithsesi, ashtu siç pritej, ardhja e Messit te Barça shkaktoi vëmendje të madhe mediatike si gjithmonë.
Kështu ishte edhe këtë herë kur Messi mbërriti pak orë para ndeshjes Barcelona – Cadiz dhe madje u spekulua se mund të udhëtonte në “Camp Nou” për ta parë atë ndeshje, por asgjë nuk rezultoi e vërtetë në fund.
Messi ka vendosur të shkojë në darkë me bashkëshorten e tij Antonella dhe ka shfrytëzuar rastin për të ftuar ish-bashkëlojtarët e tij nga Barcelona. Mirëpo, është interesant fakti se ai ka ftuar vetëm dy persona me të cilët padyshim është në marrëdhëniet më të mira dhe është avantazh që gratë e tyre janë mike prej kohësh. Bëhet fjalë për Sergio Busquets dhe Jordi Alba.