▶️Këshilli Koordinues i Diasporës (KKD), duke ndjekur me shqetësim situatën aktuale dhe tensionet politike e shoqërore në Shqipëri, shpreh qëndrimin e tij të vendosur në mbrojtje të vlerave demokratike, të drejtave qytetare, stabilitetit institucional dhe perspektivës evropiane të vendit.
KKD dënon çdo formë dhune, vandalizmi dhe cenimi të pronës publike apo private, ndërsa shpreh njëkohësisht shqetësimin e tij për çdo rast të përdorimit joproporcional të forcës ndaj protestuesve.
Në këtë kuadër, rikujtojmë domosdoshmërinë e respektimit të plotë të të drejtave dhe lirive themelore të qytetarëve.
E drejta për të protestuar dhe manifestuar në mënyrë paqësore është një nga shtyllat themelore të demokracisë dhe duhet të garantohet pa asnjë kompromis.
Duke bërë një dallim të qartë ndërmjet akteve të papranueshme të dhunës dhe ushtrimit legjitim të së drejtës për protestë paqësore, KKD kërkon që shqetësimet dhe kërkesat e studentëve dhe të rinjve të trajtohen me seriozitet, përgjegjësi dhe urgjencë institucionale.
E ardhmja e rinisë shqiptare nuk duhet të mbetet peng i përplasjeve politike apo i mungesës së dialogut.
✅️U bëjmë thirrje të gjitha institucioneve shtetërore, forcave politike dhe aktorëve përgjegjës të veprojnë me maturi, vetëpërmbajtje dhe ndjenjë të lartë përgjegjësie kombëtare. Në këtë moment të rëndësishëm për Shqipërinë, interesat e vendit dhe të qytetarëve duhet të mbizotërojnë mbi çdo interes personal, politik apo partiak.
🇦🇱Shqipëria ndodhet përballë sfidave të rëndësishme historike. Procesi i integrimit në Bashkimin Evropian kërkon stabilitet politik afatgjatë, institucione funksionale, sundim të ligjit dhe një klimë të qëndrueshme ekonomike e shoqërore.
Për më tepër, në një periudhë të karakterizuar nga zhvillime komplekse gjeopolitike dhe pasiguri ndërkombëtare, vendi ynë nuk duhet të lejojë që tensionet e brendshme të cenojnë progresin ekonomik, besimin e investitorëve, mirëqenien e qytetarëve dhe perspektivën evropiane të Shqipërisë.
▶️Këshilli Koordinues i Diasporës kërkon normalizimin sa më të shpejtë të situatës përmes dialogut konstruktiv, zgjidhjeve konkrete dhe respektimit të plotë të rendit demokratik dhe kushtetues.
Në këtë kuadër, KKD vlerëson se kapërcimi i situatës kërkon angazhim konkret në tri drejtime kryesore:
1. Uljen e tensioneve dhe forcimin e përgjegjshmërisë institucionale në garantimin e rendit dhe sigurisë publike. Garantimin e së drejtës për protestë paqësore, mbrojtjen e të miturve, hetimin e pavarur dhe transparent nga institucionet kompetente të çdo pretendimi të dokumentuar për dhunë apo përdorim joproporcional të forcës, si dhe respektimin e ligjit nga të gjithë pjesëmarrësit.
2. Dialogun e strukturuar dhe gjithëpërfshirës. Krijimin e një procesi dialogu ku studentët dhe të rinjtë të kenë përfaqësim real, së bashku me institucionet, universitetet, shoqërinë civile dhe aktorët e tjerë përgjegjës, me synimin për të adresuar shqetësimet e ngritura dhe për të identifikuar zgjidhje konkrete e të qëndrueshme.
3. Kontributin aktiv të diasporës. KKD shpreh gatishmërinë për të vënë në dispozicion kanalet ekzistuese të komunikimit institucional dhe ekspertizën e diasporës, në funksion të dialogut, uljes së tensioneve dhe mbështetjes së zgjidhjeve demokratike e të qëndrueshme.
Diaspora Shqiptare, si pjesë e pandashme e kombit dhe si një faktor i rëndësishëm në zhvillimin ekonomik, shoqëror dhe ndërkombëtar të Shqipërisë, mbetet e angazhuar për një atdhe të qëndrueshëm, demokratik dhe me një perspektivë të qartë evropiane.
Ne besojmë se forca e një shteti demokratik qëndron te aftësia për të dëgjuar qytetarët e tij, për të garantuar të drejtat dhe liritë e tyre dhe për të ofruar zgjidhje të drejta, efektive dhe të qëndrueshme.
Mesazhi i KKD-së është i qartë:
𝐉𝐎 𝐃𝐇𝐔𝐍Ë𝐒!
𝐏𝐑𝐎 𝐃𝐈𝐀𝐋𝐎𝐆𝐔𝐓, 𝐒𝐓𝐀𝐁𝐈𝐋𝐈𝐓𝐄𝐓𝐈𝐓 𝐃𝐇𝐄 𝐏Ë𝐑𝐆𝐉𝐄𝐆𝐉Ë𝐒𝐈𝐒Ë 𝐈𝐍𝐒𝐓𝐈𝐓𝐔𝐂𝐈𝐎𝐍𝐀𝐋𝐄!
Këshilli Koordinues i Diasporës u bën thirrje të gjithë aktorëve të kontribuojnë në uljen e tensioneve, kapërcimin e krizës përmes dialogut dhe gjetjen e zgjidhjeve të besueshme, duke ruajtur paqen sociale, dinjitetin qytetar, funksionimin normal të institucioneve dhe interesin kombëtar.
Këshilli Koordinues i Diasporës
(KKD)
