Kryetari i Bashkimit Demokratik për Integrim, Ali Ahmeti përmes një postimi në faqen e tij në rrjetin social Facebook ka kujtuar sot madhështinë e Besëlidhjes Arbërore të Lezhës në 579 vjetorin e saj, kuvend për të cilin ai ka thënë se ka tejkaluar konceptin e kohës me aktin e bashkimit kombëtar në mbrojtje të idealeve të identitetit.
Në frymën e këtij përvjetori, Ahmeti ka uruar përjetësinë e lidhjes mbarëkombëtare shqiptare.
“Sot kujtojmë një nga çastet historike që qëndron në piadestalet e larta të kujtesës me aktin e bashkimit kombëtar, 579 vjetorin e Besëlidhjes Arbërore të Lezhës.Ai Kuvend me nismën e Gjergj Kastriotit – Skenderbeut ku princërit arbëror i dhanë besën njëri – tjetrit për lirinë e atdheut, me madhështinë e tij ka tejkaluar konceptin e kohës, porosia e tij jeton sot mes nesh edhe pas më shumë se 5 shekujsh dhe duhet të jetë udhërrëfyesi i vetëm i veprimit tonë kombëtar të së sotmes.Bashkë të pathyeshëm rreth idealeve tona kombëtare! Qoftë e përjetshme lidhja mbarëkombëtare shqiptare!” – ka shkruar Ahmeti.
