Antonio Milloshoski, deputet dhe anëtar i Komitetit Ekzekutiv të VMRO-DPMNE-së, iu referua Propozim-ligjit për ndryshimin e Kodit Zgjedhor dhe theksoi se ndryshimet e propozuara kanë për qëllim ta bëjnë procesin zgjedhor më efikas, duke i bërë thirrje opozitës të mos e pengojë miratimin e zgjidhjeve ligjore, thuhet në njoftimin e VMRO-DPMNE-së.
“Shqetëson njoftimi se ata planifikojnë ta bllokojnë Propozim-kodin Zgjedhor. Propozimi për Kodin Zgjedhor në pjesën më të madhe përfshin inkorporimin e rekomandimeve të OSBE/ODIHR-it, që janë rekomandime të cilat i bëjnë zgjedhjet më të lehta dhe më efikase për KSHZ-në, ku LSDM ka kryetarin, dhe mendoj se këto rekomandime dhe norma të reja nuk meritojnë bllokadë politike. Nëse LSDM dhe BDI në mandatin e kaluar bënin shpesh keqpërdorim të flamurit evropian për ligje që nuk kanë lidhje me harmonizimin e legjislacionit maqedonas me atë evropian, unë si kryetar i komisionit nuk kam ndërmend të lejoj që një ligj që nuk vjen nga ajo fushë të përdorë flamurin evropian për ta kaluar ose për të shmangur filibustering-un; kjo le të jetë përgjegjësi e opozitës dhe sjelljes së saj”, tha Milloshoski dhe shtoi:
“Është e qartë se LSDM po merr vendim lidhur me Kodin Zgjedhor për shkak të dëshirës së kryetarit të LSDM-së që të mbrohet ose të gjejë një alibi nga ndonjë humbje e ardhshme zgjedhore. Filipçe tërhiqet nga Kodi Zgjedhor, nga grupi i punës vetëm për shkak të karrierës së tij personale”.
Milloshoski akuzoi se Venko Filipçe dhe opozita nuk marrin pjesë aktive në debat për ligjet që lidhen me Agjendën Reformuese, duke theksuar se opozita është pothuajse tërësisht e munguar nga debatet për ligjet reformuese.
“Kemi debat, ligjet nuk janë të diskutueshme, kalojnë në debat publik, kalojnë në debat komisioni, vijnë në seancë plenare, janë të pranishëm këtu deputetë të opozitës, nuk votojnë fare, as për as kundër as abstenim, ndërsa ligji është nga Agjenda Reformuese, asnjëherë nuk ka qenë i pranishëm kryetari i LSDM-së, Venko Filipçe, rrallë herë vjen dhe jep ndonjë vërejtje apo kritikë. Është plotësisht i munguar nga debatet për Agjendën Reformuese dhe nuk votojnë”, tha Milloshoski.
